今晚英足盃第3圈上演「英超对决」，曼联喺主场奥脱福迎战阿士东维拉。「红魔鬼」上仗联赛不敌狼队，球迷梗系唔收货，急需一场胜仗氹番粉丝；维拉啱啱借到菲腊比古天奴，但呢位巴西中场状态欠佳未必会上阵，加上佢哋近年唔多重视英足盃，曼联有望趁机赢波反弹，直取主胜。
曼联上仗喺主场倒灶0比1仅负狼队，系42年来首次喺奥脱福球场不敌对手，亦系看守领队兰历克领军6仗後嘅首场败仗。赛後球员表现备受批评，太多无压力下失误，左闸劳基梳尔赛後更暗示球队唔够团结，甚至传出王牌C朗不满兰历克战术想离队。
身为「红魔」队长，有指哈利马古尼近日频频同队友及高层密斟，赛前记招佢未有透露谈话内容，只系话着住曼联波衫但冇动力就有问题，自己有责任扭转困局，希望帮球队重返传奇领队费格逊领军时嘅高度，相信呢番说话有助提升士气。呢位中坚已全面复操，今仗可望夥拍老拍档域陀连迪路夫，巩固球队防线。
维拉唔重视英足盃
喺巴塞不得志嘅菲腊比古天奴，日前以借用形式加盟维拉，同前利物浦队友兼现任维拉主帅谢拉特再度合作，不过呢位巴西中场刚重返英伦，今仗未必赶及即时披甲。睇番维拉近6仗只得2胜4负，包括上仗联赛作客1比2不敌态沉嘅宾福特，似乎「谢老四」新帅效应已过。而且佢哋近年唔太重视英足盃，经常於较早阶段就出局，近6仗英足盃全部输晒，作客面对志切反弹嘅曼联，难逃败局。
球队历史视频及赛前分析：
