出線生死戰同丹麥駁火 挪威豁出去搶攻開半大_東方日報

歐國聯A4組兩場煞科戰,今晚同時間開賽,分別有丹麥主場對挪威,同威爾斯對葡萄牙。排小組第2嘅丹麥對第3嘅挪威屬生死戰,爭奪出線席位,兩隊踢法近似,都係攻強於守,今仗好大機會再駁火,而且雙方近4次交手3次半場開2球或以上,1.5球半場大好快夠數。(周三凌晨3時45分開賽)文:邪神

丹麥上場作客已經篤定出線嘅葡萄牙,結果令人驚喜地大勝對手4比1,前鋒海倫梅開二度、賀積查治同佐基姆安達臣都有進帳,依家領先緊挪威3分,今場仲要返主場作戰,可謂信心爆棚,雖然佢哋只要唔輸就能夠晉級,但預計唔會縮後死守,繼續搶攻。

另邊廂,挪威上場3比1力挫威爾斯結束3連敗,兩場交白卷嘅艾寧夏蘭特重拾射門鞋,射入1球,佢哋首循環曾經贏過丹麥3比2,若最終兩隊同分,會先計對賽總得分,今仗挪威肯定會搏老命,「雙殺」丹麥就取得出線權,預計今場一埋牙就搏拳,1.5球嘅半場大有計。

葡萄牙例行公事吼半和
同組另一場強弱懸殊之戰,威爾斯實力遠不及榜首葡萄牙,就算今仗有主場之利,相信仍會採取穩守突擊踢法同對手周旋,以威爾斯近4場全開半場和走勢,半場應可頂得住;葡萄牙已奪得出線資格,預料領隊佐治捷西斯會輪換陣容,加上球員錫身留力周末聯賽,今場「例行公事」極可能放慢節奏,首選半場和。


球队历史视频及赛前分析:

更多>>